स्वम्ह वरिष्ठ साहित्यकारपिंत नेवाः हना सिरपाः

११ पौष २०७९, सोमवाः

लावण्य/साँखु । ताःई तक दिनाच्वंगु नेवाः हना सिरपाः थुगु दँनिसें हानं बीगु जूगु दु । सक्वया भाषा साहित्य मुँज्या खलःपाखें थ्व सिरपाः बीगु याना वयाच्वंगु खः । ताःई तक दिनाच्वंगु जुयाः थुगुसी छक्वलं स्वम्ह नेवाः साहित्यकारपिंत थ्व सिरपाः बीगु खँ धाःगु दु ।

थुगुसी नेवाः हना सिरपाः उपन्यासकार मथुरा साय्मि, कवि योगेन्द्र प्रधान व बाखंच्वमि एवं कवि नर्मदेश्वर प्रधानयात लःल्हाइगु जूगु दु । वय्कःपिंसं थःथःगु ख्यलं नेपालभाषा साहित्यया ख्यलय् यानादीगु योगदानया कदर यासें थ्व सिरपाः लःल्हायेत्यंगु खः ।

थ्वहे वइगु शनिवाः सक्वय् छगू ज्याझ्वःया दथुइ थ्व सिरपाः लःल्हाइगु ग्वसाः दु । थ्व सिरपाः २० द्वः तका धनराशीया खः । सिरपाः लःल्हाइगु उगु हे ज्याझ्वलय् डा. बालगोपाल श्रेष्ठया निगू सफू ‘जिगु दापू ः जिगु धापू’ व ‘नेपालय् जातीय पहिचान व भाषिक समान अधिकारया न्ह्यसः’ अले साहित्यकार श्रीलक्ष्मी श्रेष्ठया निगू सफू ‘एल्फेज (कविता मुना)’ व ‘जीवनया लँपुइ (बाखं मुना)’ नं विमोचन जुइगु ग्वसाः दु ।

समाचार स्रोत ः नेपालभाषा टाइम्स