जनादेश अनुरुप एमाले, माओवादीको परीक्षण हुनु आवश्यक

 

मुलुक केही समयको लागि राष्ट्रिय सभा सम्बन्धी अध्यादेशको बन्धक बनेको आभास मिलेको थियो । यो अध्यादेश चुनाव हुनु २ महिना अघि नै सरकारले राष्ट्रपतिसमक्ष पठाएको भएतापनि राष्ट्रपतिले होल्ड गरिराखेका थिए ।

चुनावपछि एमालेले बहुमत ल्याएको अवस्थामा एमालेले बहुमतिय प्रणालीबाट राष्ट्रिय सभाको चुनाव होस् भन्ने चाहेको थियो । हुनतः चुनाव अघि पनि यस विषयमा दलहरुबीच मतभेद भएपछि संसदको अधिवेशन सम्पन्न गरि मन्त्रिपरिषद्बाट पारित गरि राष्ट्रपति समक्ष पठाइएको हो । यस विधेयकमा राष्ट्रिय सभाको निर्वाचन एकल संक्रमणीय प्रणालीमा गर्ने उल्लेख छ । जुन एमालेको चाहना विपरीत थियो ।

सोही कारण राष्ट्रपतिले यस अध्यादेशलाई होल्ड गरेको देखिन्छ । जुन संवैधानिक राष्ट्रपतिको भूमिका विपरित भयो भन्ने आरोप काँगे्रस लगायतका दलहरुले लगाएका थिए । अझ अध्यादेश पारित गरियोस् भनेर सर्वोच्चमा मुद्दा समेत दायर भएको थियो ।

राष्ट्रपतिले पनि दलहरुको सहमति खोजिरहेको थियो । त्यसपछि दलहरुले यस सम्बन्धमा आफ्नो धारणा सार्वजनिक गर्नको लागि सर्वदलीय बैठक बसेतापनि कुनै निकास निस्किएको थिएन । राष्ट्रपतिलाई अध्यादेश रोकेको कारण राष्ट्रिय सभाको चुनाव रोकेको र सरकार गठनमा समेत समस्या निम्त्याएको आरोप लाग्ने अवस्था आईसकेको थियो । त्यसमाथि अध्यादेश जारी गराउनको लागि मुद्दा समेत परेको थियो । यसरी दबाव बढेपछि राष्ट्रपतिले अन्ततः अध्यादेश प्रमाणिकरण गरि जारी गरेको छ ।

यो अध्यादेश पारित भएसँगै नयाँ सरकार बन्ने बाटो पनि खुलेको छ । तर पनि निर्वाचन आयोगले माघको तेस्रो सातातिर मात्रै प्रतिनिधि सभाको समानुपातिकको परिणाम घोषणा गर्न सकिने बताएको हुँदा नयाँ सरकार बन्नको लागि माघको अन्तिम सातासम्म कुर्नु नै पर्ने हुन्छ । तर यसबीच अहिलेसम्मका घटनाक्रमलाई हेर्ने हो भने माओवादी केन्द्र र एमाले मिलेर सरकार र पार्टी एकीकरण समेत हुने हो वा एमाले र मधेशवादी मिलेर सरकार गठन हुने हो भन्ने कुनै निस्कर्ष निकाल्नु हतारो हुने देखिएको छ ।

दलहरुबीच यस विषयमा धनीभूत छलफल भईरहेको हुँदा यसै भन्ने स्थिति रहेको छैन । तर पनि जनादेश अनुसार एमाले र माओवादी केन्द्र सम्मिलित सरकार बन्नु आवश्यक देखिन्छ भने प्रतिपक्षमा काँगे्रस रहनु आवश्यक छ । यसले गर्दा शक्ति सन्तुलन पनि हुने र वामगठबन्धनको परीक्षण पनि हुने हुँदा यो विकल्प सबैभन्दा उत्तम विकल्प हो भन्ने कुरामा दुईमत नहोला !

लावण्य सन्देश वर्ष ७ अंक २८ को सम्पादकीयबाट