माधवनारायण मन्दिर निर्माणको लागि जग खन्ने काम सुरु

२०७८ भाद्र १९ गते

लावण्य/साँखु । श्री माधवनारायण स्वस्थानी व्रत तथा शालिनदी सुधार समितिले श्रीश्रीश्री माधवनारायणको मूल मन्दिर बनाउनको लागि जग खन्ने कार्य भाद्र १७ गते बाट सुरु गरेको छ ।

केही साता अघिदेखि यस कार्यमा समिति लागिपरेको भएतापनि मौसम अनुकूल नहुँदा सम्म खन्ने काम थालेको थिएन । अहिले मौसम अलिकति खुल्नासाथ समितिले काम थालेको हो ।

यो मन्दिर खोलातिरबाट हेर्दा ३ तल्ले र भीमसेन पाटी तर्फको साईडबाट हेर्दा २ तल्ले देखिनेछ ।

यस मन्दिरको लागत ३ करोड ५० लाखको अनुमान गरिएको छ । जुन रकम केही कम हुन सक्ने आँकलन गरिएको छ ।

मन्दिर निर्माणको लागि आवश्यक काठको जोहो गर्दै समितिले केही ट्रक काठ चिरान गरेर ल्याईसकेको छ ।

यस मन्दिरमा करीब २ करोड ७० लाख बराबरको काठको काम हुने अनुमान गरिएको छ ।

यही भाद्र १८ गते समितिले शालिनदी परीसरमा निर्माण गरिएको माधवनारायण पार्कको स्तम्भमा राख्नको लागि मैनको मूर्ति तयार भईसकेको जनाएको छ ।

ढलौटको मूर्ति बनाउनु अगाडि मैनको मूर्ति बनाईएको हो । सो मैनको मूर्तिलाई माटोले ढाकेर ढलाई गरेपछि ढलोटको मूर्ति तयार हुनेछ ।

सो मूर्तिमा कस्तो रङ्ग लगाउँदा उचित हुन्छ भनि समितिले विज्ञहरुसँग सल्लाह लिईरहेको बुझिएको छ ।

गत बैशाखमै निर्णय गरेर मूर्तिको लागि अर्डर गरेपनि कलाकार महेश तुलाधरको कार्यव्यस्तता र लकडाउनकै बीचमा कार्य मूर्ति बनाउने कार्य गरिरहँदा पनि मूर्ति भर्खर तयार भएको समितिले जनाएको छ ।