बाखं : नकचरा

– श्रीभक्त जोशी

वनेथें पहः ज्याना दच्छि लिपा झोकमनिम्ह कोरोना हाकनं तिईजक गारे जुया लिहाँ वया चोन । लिहाँ वया चोन तिनि का । दोलखा जिल्लाया छगु गांया कुंचाय् चोना, जीवन हना चोंम्ह प्रेम लिम्बुया थासय् ।

बर्षाया छन्हु चान्हे आकाझाकां चल वया छेँ बुँ नापं दको काय्, म्ह्याये व कला नं यंकल । पे्रम छम्ह मेगु थासे पिहाँ वना चोंगु ई जुया जक बचे जुल । कन्हे खुन्हु छेँ लिहाँ वना सोबले छेँ बुँ दको भताभुंग जुया चोंगु खनाः, सर्गतं ल्हा वथें हे जुया वया म्हय् ज्यू मन्त ।

उकिं लिपा छम्ह तमिम्ह साहुया थासे वना । भाव भक्ति याना ङयदो तका दां त्याना जोना वल । छगू चिकिचा जक धंगु व्यवसाय जुसा नं लजगा याना नयेगु तातुना येँ वल ।्

छक सार्वैजनिक जग्गाय् टहरा दयेका चोन । लँय् लँय् चोना कागति मिगु ज्या याना जीवन हना चोंगु सोये मफया वम्ह दोस्रोम्ह कोरोना नाप खँल्हाबल्हा याना चोन । सिईधासा आत्म हत्या याना गथे सी ? म्वाना चोने धासा छु जक नया म्वायेगु । धायेतला प्रधानमन्त्रीं भाषण याइ । थाय् बाय् व नयेगु बिना सुं नं जनता द्यांलाना सी मालि मखु हँ । अले हाकनं सकल जनताया छेँ छेँ पतिकं ग्याँस पाईप लाईन जोरे जुइ तिनि हँ । आथेँ सिलिण्डर पाछाना जुई मालि मखु हँ । चाइनां लुम्बिनी तक रेल हय् मानि हँ । भारतं नारां घाट तक पानी जहाज नं हय् मानि हँ धागुलिं । वहे छकसां सोया सी मालि धैगु मति तया । सिना सिना जुसा नं म्वाना चोना तिनि ।

तर केपी ओली प्रधानमन्त्रीया भाषण धाःसा नाय्या चुपिया धाः सोयानं जो । तर ज्या धासा सिन्का ति हे मजोगुलिं जनतात अजुचाया चोन । उकिं छ कोरोनां जिमि लाज मदुम्ह धेताम्ह प्रधानमन्त्रीयात च्यालेन्ज बिया ख्या वयागुला ? छ थजाम्ह कोरोना झीम्ह वसा नं ग्याई मखु जिमि थायेयाम्ह प्रधानमन्त्री, स्यूला छं ?

सोंगु कोटी जनतामध्ये छगू कोटी जनता छं यंकल धासानं ग्याई मखु । उकिं छन्त माक्व मनूत यंकि हुँ ... । गणतन्त्रया देशय् छन्त नं स्वतन्त्र जुल । छाय् धासा आन्दोलन याईपिं मनूतला म्हो जुई नि ! अले थः यत्थें शासन याये दइ । धका नुगलय् खँ वायेका चोंम्ह पे्रम लिम्बु यात आकाझाकां ने.सं. ११४१ बछलागा तृतिया (२०७८ बैशाख १६ गते) निसैं निवाः तक लक डाउन (निषेधाज्ञा) जुल ।

उकिं लिपा हाकनं निवाः तक लकडाउन घोषणा या नापं कडा नियम नं पिहाँ वल । यदि सुनानं लक डाउनया नियम त उल्लंघन यातसा स्वदँ तक जेल सजायँया नापं स्वंगु लख दां नं द्वपं पुले मालि हँ । उगु लकडाउनया ईयात तातुना । पुलिसत छ थ्व पे्रम लिम्बुया टहराय् हुलुलुलु वया थुं वल । पे्रम लिम्बुं पुलिस तय्त भाव भक्ति याना ईनाप यात । अति दुःख कष्ट याना दां त्याना दयेकातगु टहरा थुना दिमते हजुर ... ।

थजागु महामारीया लक डाउन ईलय् जि गन वना चों वने ? करजोरी बिन्ति धका धालनं जाग्वारा पुलिस तय्सं छुं हे खँ मन्यंसें झन स्यालय् ति थें याना टहरा भताभुंग याना थुना बिल ।

पे्रम लिम्बु यात सिमां कुतुंवम्ह थें जुल । न्ह्यलय्ला जोलय्ला थें जुया वाताहाँं जुल । पर्वत दुना वया ल्हा वगु थें हे जुल । पे्रम लिम्बुयात म्ह छम्हं करेन्ट वथें वाँइइइयां मिना तं वल । लाखे खाथें खाना कि स्यायेगु कि म्वायेगु धका दन दन मिच्याना चोंगु होमय् दुब्वाय् थें जाग्वारा पुलिसतय्गु पुचलय् वना छक झातापातां सना हाल । पे्रम लिम्बु याक चियागु छुं हे मुता मन्त । उलि मछिं पुलिसतय्गु न्ह्यने । “हान ! साले लाई” धका पुलिस तय्सं लाकामं च्वाय् जिको च्वाना भ्यानय् तया पुलिस चौकी पाखे ब्वाके यंकल । पुलिसतय्त हातपात यात धका तोह तया । सोदँ तकया लागि जेल सजायँ धका जेलय् सोथना बिल ।

अले पे्रम लिम्बुया जेलय् चोना बिचा बिमर्श याना चोन । काम चलाउ सरकारं हगु बजेट गुलि तक तालात ? कर्मचारीत व जेष्ठ नागरिक तय्त भत्ता भतिचा बढे यागुला । चाकु केना भुजिं लायेगु ज्या सरह जक जुल ।

अर्बौँ तका दां चुनावय् खर्च यायेत न्ह्याग्गु याना जुसानं राष्ट्रया ढुकुटी खाली याये मागु दु । अलय् कोरोना यात प्राथमिकता बिया बजेट तयां जक छुयाय् ? न्हय द्व मनूत सि धुंका वास याये थें जक जुल । सिई धुपिं मनूत म्वाना वइ मखुत । आ न्ह्याको हालानं छुयाये ? धगचा व पन्यू प्रधानमन्त्रीया ल्हातिई हे दु । छु याये मास्ति व थो ईलय् न्ह्यागु यासां ज्यू ।

ऋणया भार दको जनताया छेनं कोविना चोंगु हे दु । आहाः भाषण याई वले धासा गुलि जक बांला । थाय् बाय् व नयेगु बिना जनता सुं हे द्यां लाना सि मखु हँ धागु खँ आ तिनि झसक्क लुमना वल । थाय् धयागु जेल । बाय् धयागु सिमेन्ट कोठा । अले नयेगु धयागु मोटा जाकिया जा निगचा ।

(प्रतिक्रियाको लागि lwsandesh@gmail.com)