साँखु बजार वरिपरीको ढल व्यवस्थित नहुँदा सडक उपभोक्तालाई सकस पसल डुवानमा

लावण्य/साँखु । साँखु बजारको पुरानो बसपार्कदेखि नयाँ बसपार्क हुँदै साल्खा महादेवस्थानसम्मको सडक पक्की बनाउन सांसद विकास कोषको ३ करोड रकमबाट काम भइरहेको छ ।

सो सडकको काम सुरु गर्नु अगाडि पानी जाने ढल व्यवस्थित गर्नुपर्ने काम समयमै नहुँदा अहिले सो बाटो बन्द प्रायः भएको छ । साथै सो सडक छेउमा पसल गरेर बसिरहेका स्थानीय दीपक श्रेष्ठको पसल अविरल वर्षाका कारण डुबानमा परेको छ ।

उहाँका अनुसार ठेकेदारलाई पटक पटक भन्दा पनि ध्यान नदिएको र जनप्रतिनिधिले पनि गुनासो गर्दा वास्ता नगरेको हुँदा अहिले यस्तो स्थिति आएको हो ।

डुवानका कारण उहाँको पसल र टहरामा क्षति पुगेको छ । वहाँका आँकलन अनुसार करीब ५० हजार बराबरको क्षति भएको छ ।

राति पानी पर्दा भित्र सुत्ने कोठा समेत पानीले भरिएकोले रात भरी सुत्न नपाएको उहाँले बताउनु्भयो । आफुलाई अब सो क्षतिपुर्ति कसले दिने भनि आक्रोश ब्यक्त गर्नु भयो ।

केही दिन अगाडि बैँक अफ काठमाडौँ अगाडि ढल बनाउँदै गरेको अवस्थामा बैँकमा वृद्ध भत्ता लिने सेवाग्राहीहरुले दुःख पाएपछि बैँकले आफ्ना सेवाग्राहीहरुलाई पछाडिको ढोकाबाट सेवा दिइरहेको छ ।

यसरी वृद्धावृद्धाहरुलाई पछाडिको ढोकाबाट व्यवस्थित गरिँदा भने उनीहरु खुशी नै देखिन्थे ।

त्यसैगरी ढलको काम सुरु गरेदेखिनै शालिनदी चोकदेखि प्रभुबैँक अगाडिसम्मको सडक पनि हिलाम्मे भई सडकमा पैदल समेत हिँड्न नसकिने अवस्थामा पुगेको छ ।

यस्तो अव्यवस्थित असारे विकासका कारण सर्वसाधारणलाई सकस भएको छ । तर जनप्रतिनिधिहरुले भने आफू दैनन्दिनरुपमा सोही सडक प्रयोग गर्नुपर्दा समेत सर्वसाधारणको सकश देखेको नदेख्यै गरेको बताउँछन् स्थानीय ।

सडक निमार्णमा बाटो भन्दा ढल धेरै अग्लो भएकोले बाटोको हाईटलाई केही घटाउन बारम्बार आफुले ठेकेदार र वडा नं. ६ का वडा अध्यक्षलाई भन्दा पनि आफ्नो कुरालाई वास्ता नगरेको स्थानीय राजेश्वर श्रेष्ठको कथन थियो ।