नेवार समुदायको सञ्चार क्षेत्रमा पहुँचको कमी

नेवार समुदायको एउटा ठूलो हिस्साको नेतृत्व गरिरहेको संस्था हलिं नेवाः गुथि । हलिं नेवाः गुथिको राष्ट्रिय महाधिवेशन साँखुमा भर्खरै सम्पन्न भएको छ ।

राष्ट्रिय महाधिवेशन त्यो पनि काठमाडौँ जिल्लाको उत्तरपूर्वी भेगको साँखुमा गरिँदा पनि मूलधारको मिडियाको त कुरै नगरौँ भाषाभाषी र जातजातिहरुकै लागि खोलिएका सञ्चारकर्मीहरुको उपस्थिति समेत न्यून रह्यो । जबकी अहिले साँखुमा पुग्ने बाटो पनि राम्रो अवस्थामा रहेका छन् भने साँखुमा आधुनिक सुविधाको कुनै कमी छैन । अझ सञ्चारकर्मीहरुको लागि आवश्यक इन्टरनेट सुविधाको लागि कुनै अप्ठ्यारो स्थिति छैन ।

महाधिवेशनको उद्घाटन सत्र तथा त्यसपछिको साँस्कृतिक कार्यक्रमको प्रत्यक्ष प्रसारण इण्डिजिनियस टिभी र आईटिभीले गरेको थियो । तर यही अधिवेशनको समाचार संकलनका लागि भने नेवार समुदायको प्रतिनिधित्व गर्ने इमेज च्यानल, एभिन्यूज टिभी, नेवा एचडी टिभी, मेट्रो एफ एम, उज्यालो अनलाईन, नेवाः अनलाईनको समेत उपस्थिति देखिएन ।

त्यहाँ नेवाः सूचना केन्द्रका प्रतिनिधि देखिएको थियो भने नेवाः पत्रकार दबुका राष्ट्रिय अध्यक्ष, पूर्व राष्ट्रिय अध्यक्षहरु देखिँदा पनि नेवाः समुदायकै मूलधारका सञ्चारकर्मीहरुको समेत उपस्थिति नहुनुलाई अर्थपूर्ण रुपमा हेरिएको छ ।

हुनतः महाधिवेशनमा पत्रकारहरुलाई निम्ता नगरिएको पनि हुनसक्छ । महाधिवेशन आयोजक समितिले कुनै खाले पत्रकार सम्मेलन समेत गरेको थिएन ।

यहाँनिर बुझ्नै पर्ने र जान्नै पर्ने एउटै कुरा छ– “बोल्नेको पिठो बिक्छ, नबोल्नेको चामल बिक्दैन” भनेझैँ अहिलेको बीसौँ शताव्दीको युगमा पनि हामी मिडियासँग नजिक हुँदैनौँ भने कहिले हुने ?! यो प्रश्न उब्जिनु स्वाभाविकै हो ।

कुनैपनि प्रजातान्त्रिक मुलुकमा मात्रै हैन, कुनै पनि प्रजातान्त्रिक संस्थामा समेत मिडियाको महत्वपूर्ण भूमिका हुन्छ नै । यत्ति कुरा जान्दा जान्दै पनि मिडियाबाजीमा नेवार समुदाय पछि पर्नु बडो दुःखद स्थिति हो । यसैले नेवार समुदायका अगुवा साथिहरुले तत्कालै आफ्नो व्यवहार परिवर्तन गरेर आफूहरुको काम मिडियामा लैजानको लागि आफ्नो संगठनमा मिडिया हेर्ने छुट्टै विभाग गठन हुनु वाञ्छनीय हुन आउँछ ।

यदि समयमै यस्तो गरिएन भने हामीले गरेका राम्रा कामहरु समेत ओझेलमा पर्नेछन् र नराम्रा काम गर्नेहरु नै भएपनि जो मिडियामैत्री वातावरणमा संगठन चलाउँछन् उनीहरुकै प्रचार प्रसार धेरै हुँदा उनीहरु नै अगाडि देखिन्छन् । सबैलाई चेतना भया !